Гүн байрлалтай хураагуур судсанд бүлэн үүсэх ба уушгины артерт бүлэнт бөглөрөл үүсэхээс сэргийлэх ба эмчлэх,  титэм судасны цочмог хам шинжүүд, зүрхний шигдээс, захын судасны бөглөрөл зэрэгт хэрэглэнэ. Цусыг биеэс гадуур эргүүлэх эмчилгээний  бүх аргуудын үед цус бүлэгнэхээс сэргийлэх зорилгоор хэрэглэнэ.

Гепариныг судсанд дуслаар тасралтгүй хийх,  эсвэл тодорхой цагийн давтамжтай шууд тарих мөн арьсан дор тарих (хэвлийн арьсан дээр) байдлаар хэрэглэдэг. Тунг эмч тогтооно.

Харшлын хариу урвал: арьсны гипереми, эмийн гаралтай халууралт, чонон хөрвөс, хамрын салстын үрэвсэл, арьс загатнах, хөлийн ул халуу оргих, гуурсан хоолойн агчил, коллапс, анафилаксийн шок. Толгой эргэх, толгой өвдөх, дотор муухайрах, хоолны дуршил багасах, бөөлжих, гүйлгэх. Ялтас эсийн тоо цөөрөх (өвчтөнүүдийн 6%-д). 1-р хэлбэрийн урвалууд хөнгөн хэлбэрээр илэрдэг ба эмчилгээг зогсоосны дараа алга болно; ялтас эсийн тоо цөөрөх нь хүнд явцтай бөгөөд амь насанд хүрэх аюултай. Гепаринаас үүдэлтэй тромбоцитопенийн үед арьс үхжих, артерийн бүлэн үүсэх, улмаар хийт үхжил, зүрхний шигдээс, цус харвалт үүснэ. Хүнд хэлбэрийн тромбоцитопенийн (тромбоцит анхны хэмжээнээс 2 дахин эсвэл 100 мянга/мкл-с багасна) үед гепарин хэрэглэхийг яаралтай зогсоох хэрэгтэй. Удаан хугацаанд хэрэглэхэд – ясны сийрэгжил, арьс аяндаа хугарах, зөөлөн эд кальцижих, гипоальдостеронизм, түр зуурын үс уналт, элэгний трансаминазын идэвхижил ихсэх. Хэсгийн хариу урвал: тарьсан газарт цочрох, өвдөх, цус дүүрэх, цус хурах; цус алдах (гаж нөлөөг сайтар үнэлэх, цусны бүлэгнэлтийг лабораторийн шинжилгээ хийн тогтмол хянах, тунг нарийн тооцоолсны үндсэн дээр эрсдлийг багасгаж болно). Ходоод гэдэс, шээсний зам, тарьсан газар, даралтанд өртдөг хэсэг, мэс заслын шархнаас цус алдах, бусад эрхтэнд (бөөрний дээд булчирхай, шар бие, хэвлийн гялтангийн арын зай) цус хурах.

Гепаринд хэт мэдрэг байдал, цус алдах чанар ихэссэн эмгэгүүд (гемофили, тромбоцитопени, васкулит г.м), цус алдалт, тархины судасны цүлхэн, гол судасны цүлхэн урагдах, цусархаг цус харвалт, фосфолипидийн эсрэг хам шинж, гэмтэл (ялангуяа эрүү-толгойн), артерийн даралт хяналтгүй ихсэх, ходоод гэдэсний замын шалбархайт-шархлаа; улаан хоолойн венийн өргөсөлтэй элэгний цирроз; сарын тэмдгийн үе, зулбалт, төрөлт (үүнд, саяханы), нүд, тархи, түрүү булчирхай, элэг, цөсний зам дээр саяхан хийгдсэн мэс ажилбар, нугасны хатгалт хийсний дараа, жирэмсэн ба хөхүүл үед хэрэглэхгүй.