Бэлдмэлийг хүчиллэг сөөргөө ба цээж хорсох үед хэрэглэнэ.

Насанд хүрэгсэд ба 12-оос дээш насны хүүхэд: нэг удаагийн тун нь 1-2 шахмал бөгөөд өвдөлтийн үед хоногт 4-8 шахмал хэрэглэнэ. Шахмалыг амандаа бүрэн уустал нь байлгах буюу эсвэл зажилж болно. Хүчтэй өвдөлтийн үед бэлдмэлийн тунг богино хугацаанд хоногт 12 хүртэл шахмал болгон ихэсгэж болно. Бэлдмэлийг хэрэглэх үргэлжлэх хугацаа нь 10 өдрөөс хэтрэхгүй байна.

Дархлалын системийн зүгээс: маш ховор: харшлын урвал - тууралт, чонон хөрвөс, Квинкийн хаван, анафилакси. Хоол боловсруулах замын зүгээс: дотор муухайрах, бөөлжих, ходоод хямрах, суулгах. Бодисын солилцоо ба тэжээлийн зүгээс: бөөрний үйл ажиллагааны өөрчлөлттэй өвчтөнд бэлдмэлийг өндөр тунгаар удаан хугацаагаар хэрэглэснээс тун хэтрэлттэй холбоотой гипермагниеми, гиперкальциеми, шүлтшилийн шинж илэрч хоол боловсруулах замын зүгээс илрэх шинж тэмдгийг (дотор муухайрах, бөөлжих, өтгөн хатах) болон булчингийн сульдлыг сэдрээж болно. Араг яс-булчингийн систем, холбогч эдийн зүгээс: булчингийн сульдал. Мэдрэлийн системийн зүгээс: амт мэдрэхгүй болох, толгой өвдөх. Бөөр ба шээс ялгаруулах системийн зүгээс: цусан дахь азотын хэмжээ ихсэх. Сүү-шүлтийн хам шинжтэй холбоотой урвал: сульдал, кальциноз. Гаж нөлөө, ялангуяа уг эм хэрэглэх зааварт тэмдэглэгдээгүй гаж нөлөө илэрвэл бэлдмэлийг хэрэглэхээ зогсоож эмчид хандах шаардлагатай.

Бэлдмэлийг жирэмсэн эмэгтэйд зөвхөн зайлшгүй шаардлагаар л хэрэглэж болно. Реннийг нефрокальциноз, хүнд явцтай бөөрний дутагдал, цусан дахь кальцийн хэмжээ ихсэх, шээстэй кальци ихээр ялгарах, цусан дахь фосфатын хэмжээ багасах; фруктоз зохидоггүй, глюкоз-галактозын шимэгдэлтийн алдагдал, сахараз-изомальтазын дутагдал зэрэг удамшлын эмгэг; бэлдмэлийн найрлага дахь бүрэлдэхүүн хэсгүүдэд хэт мэдрэг хүмүүс, булчин сульдал, гэдэсний түгжрэл зэргийн үед тус тус хэрэглэхийг цээрлэнэ.